Upacara Seren Sumeren Panganten Sunda

Mapag  Jajaka Tandang

+    Batur jenuk balarea, kadang warga merbayaksa, kiwari dihin pinasti, ayeuna datang

mangsana, pasini manjing na ati, subaya datangna bagja.

-          Balebat di Beulah wetan, surya medalna mumunggang, nyaangan alam sakumna, hayam raong kongkorongok, manuk recet disarada patembalan jeung baturna, mapag ni’mat taya hingga, asihna Gusti Yang Widi.

+    Manusa lugay lumampah, ngalengkah geusan ibadah, nyoreang mangsa katukang,

ngajadi eunteung nu datang.

-          Sumerah ka Maha Akbar, sujud ka Nu Maha Agung, manusa taya kawasa, anging ku kersa AnjeunNa, Pangeran Nu Murbeng Alam.

+    Bagja temen,….bingah temen…. Anaking bagea sumping.

Dituyun pangjurung indung, disalindang ku kamelang, ngabrul dulur nu saestu, nganteur ludeung jajaka gandang rek makalangan, lunta ti pangtapaan.

      -    Dipapag kembang kamelang, malati asih ngajadi ciri, saksi buktina ngahiji, pasini  baris

rarabi,  subaya geusan rimbitan, mungkas alam lalagasan.

Pel….napel dina ati nu sajati.

+    Belut sisit saba darat, kapiraray siang wengi

-          Jagong tuhur meunang ngunun, haturan bagea sumping…..

+    Tutut gunung keong reuma, sumangga geura gek calik….

Upacara seren sumeren & akad nikah

Ria Listi Lindayani – Adam Saepul Bahri

                                    Disusun ku Kang Undang ( Eyangna ).

+   Khutbah

-          Bubuka

+   Kitu sabdaning carita, gerentes hate nu gaduh maksad, kebek ku rasa kabungah, bungangang na rasa bagja, nampi takdir Maha Suci, syukur ka Nu Maha Agung, nembrak ka balarea.

-          Sinigeug lampah ayeuna, urang wincik hiji-hiji, urang guar malar natrat runtuyan acara seren sumeren kalih akad nikah.

+    Bubuka,….parantos kapihatur nembe.

v    Galindeng Kalam Ilahi sareng sholawat

v    Seren sumeren nu diwangun

ü    Biantara Pihak Pameget

ü    Biantara Pihak Istri

ü    Simbul

v    Akad nikah puncakna kabingah

v    Sawer panganten talari karuhun, budaya sunda

v    Du’a

v    Tutup

-          Gapura galura bagja, ngaliglag lawangna muka, urang papag urang sambat, disuhun bari dirungrum, dirawu bari dipangku, kebek ku kabungahan, pinuh ku rasa syukur.

+   Galindeng kalam Ilahi, ngajadi cirri sajati, warti anu mimiti, tumut patuh kana dawuh, papagon dina lumampah, sangkan mulus rahayu rahmat salamet, disarengan ku ridoNa.

-          Ka pun lanceuk Teh Apong Solihat, uwana pituin kapiutus ngagalindengkeun kalam Ilahi kalih aosan sholawat, nyanggakeun.

+    Kalam Ilahi ngajadi ciri keur diri, papagon dina hirup kahirupan, pangjejer dina ugeran, malah mandar tinekanan lalampahan.

-          Nyaliara tur mikacinta dina rasa dina raga, ka Jungjunan Gusti Rosul, sangkan kaangken umatna, ti dunya dugi ka yaumal jaza. Aamiin.

+    Dulur-dulur pada ibur, tatangga pada tumanya, aya naon aya naon, ti mendi itu tatamu, ngaleut ngeungkeuy ngabandaleut, ngembat-ngembat nyatang pinang.

-          Urang susud ka puhuna urang papay ka asalna, nya naon gara-garana, boa-boa aya maksad tacan kedal, kereteg hate can eces.

+  Sina guar naon pamaksadannana, sangkan katanggar ku balarea, nu hempak sinewaka,  merbayaksa danget ayeuna.

-          Pinisepuh nu nyesepuhan para tatamu,. Bapa…………sumangga nhanggakeun waktosna……..panyerenan

+   Deukeut-deukeut anak taleus, singhoreng simana horeng, urang Bloklame nu disesepuhan ku Bapa …..

Diwincik eusi galihna, diguar rasa manahna, natrat maksad-maksadna eces jentre kasaksian balarea.

-         Kembang-kembang harepan, pucuk-pucuk pamuntangan, gugupay bari ngiceupan, ngabageakeun nu datang meredih ka bale nyungcung.

+   Urang tepungkeun saurna, urang tepangkeun walerna, sangkan eces malar jentre, sing puguh bule hideungna.

-         Ingkang Eyang anu salawasna ngiring nyaah, mikawelas mikamelang, mo kapalang nembrakeun asih jeung deudeuh, kiwari baris tandang makalangan ngawakilan ingkang rama Wa Dani Somadani sarimbit, itung-itung pakaulan, nande golontorna kabingah, sangkan mutiara bagja tinemu dina mangsana.

+    Ka pun lanceuk, Kang Undang Solih eyangna pituin nyanggakeun waktosna……panampian.

-         Batu turun keusik naek kalapa tonggoheunnana, itu purun ieu daek kacida bogoheunnana.

 +  Estu taya halangan harungan, taya aling-aling nyangling, ngabulungbung alur syukur, ngabalungbang rasa bagja, nyangga mangsa kabagjaan.

-         Runtuyan acara nu salajengna, tawis asih rasa nyaah, lahir tina cirri bukti, gelar tina tawis soca……simbolik

+    Simbul sing ngajadi saksi, saksi lahirna ngahiji, sing jadi pamatri ati panyangcang duriat, hamo pegat nepi ka paturay nyawa.

-         Sumangga ka ramana nyerenkeun putra kaasihna, ditampi ku ramana pibesaneun ti pihak istri, geusan gasik nampina.,

-         Ka Ibuna ti pameget nyanggakeun tawis socana, nu ditampi ku ibuna ti pihak istri Teh Eneng sumangga tampi.

 +   Ditanggap ijab kabulna, disaksi sigot ta’likna, nyumponan syarat rukunna, syarat syara’  tur nagara, pasini baris rarabi, subaya baris laksana, meungkeut pageuh ku kadeudeuh, geter rasa kahariwang, pasini pakait asih, subaya mageuhan rasa, beber layar tarik jangkar.

-         Panganten sakalih digingsir linggih, disarengan ibu rama, disangkeh pinuh kadeudeuh, disalindang ku kamelang, anu munggaran ngalengkah, miang ka sagara kabagjaan.

 +    Kasanggakeun ka Bapa ti KUA Kacamatan Pameungpeuk kanggo nyesepuhannana, kairing ku para saksi

-         Sateuacan ijab Kabul, kedal lisan ku kamelang, pibekeleun babarengan, jadi jeujeur keur pangjejer, keur papagon palenggeran

 +   Ingkang Eyang mo kapalang, teu weleh mere kanyaah, rek mekelan tutungkusan, lengkah sajatining hirup,  sangkan apanjang apunjung, ginulur karahayuan.

Ka Kang Undang Solih nyanggakeun waktosna, mahanan kanyaah rasa….khutbah nikah

-         Tutas rantas akad nikah, blung blang taya halangan harungan, teu aya nu nyisikudi, surup kana lelembutan, nyaosan papagon agama tur nagara.

+  Nyanggakeun ka Maha Asih, muga panganten sakalih, nincak kana babasaan, ka cai jadi saleuwi, ka darat jadi salebak, babakti ka Maha Suci ka Pangeran murbeng alam.

-         Tabah mun manggih kasusah, bungah teu loba paningkah, hormat ka indung ka bapa, umaku ka dulur-dulur, someah hade ka semah.

      +    Sujud ka lahunan indung, nyaluuh ku laku silung, nyangga du’a ingkang rama, malah mandar     tinekatan sapaneja, sembah sungkem ayeuna mangsana.

-          Mah, …hapunten abdi, tina sadayana dosa, rumaos sok bengal basangkal, ti kawit gumelar ka alam dunya, dugi ka danget ayeuna, pidu’a anu diteda tinekanan pamaksadan.

-          Geulis anaking, jimat awaking, dihampura geulis ku mamah, taya dosa nu napel na diri hidep, sirna taya urutna,

-          Didu’akeun ku mamah, mugi hidep mulus rahayu rahmat salamet,  panjang jodo parek rizki, sing jadi istri sajati, nu babakti ka salaki bari teu lali ka Gusti.

-          Pa,.. hapunten abdi, rumaos seueur dosa dimana aya kahoyong, abdi ngarepotkeun Bapa, tisuksruk tidungdung melaan abdi, taya siang taya wengi, Bapa tohtohan nyumponan kahoyong abdi. Du’akeun ku Bapa abdi lunta ti mamah ti bapa nuturkeun salaki abdi.

+ Geulis anaking pupunden ati,.. tong boroning hidep kedal menta, dalah henteu…….., panghampura indung oge bapa salawasna maplak da puguh lautannana, pangdu’a indung oge bapa salawasna ngocor da puguh wahangannana….dihampura pisan geulis.

Muga hidep tinekanan pamaksadan, sing ngawujud rumah tangga nu sakinah, didadasaran ku mawaddah tur warohmah, silih asih silih asah silih asuh, hurung nangtung siang leumpang, tiis ceuli herang mata.

Bapa percaya ka salaki hidep, baris mikaasih mikanyaah.

Bral …. Anaking geura miang tandang makalangan, papag mangsa nu bakal datang nu pinuh ku pangharepan….

-          Dipirig kacapi suling, gulak gelik narik ati, kentring kacapi nu kapigandrung, marengan rasa kamelang, nu didangding ku haleuang, haleuang di panyaweran….sawer panganten

-          Ngiring bingah ngajejeran, dina sawer panganten. Nyanggakaeun ka Ibu…….

+   Urang antebkeun riungan, sanggakeun ka Maha Agung, ka Pangeran Maha Beunghar, wireh lancar pamaksadan, kahontal taya kuciwa, malah mandar ngambah sagara rimbitan, tinemu jeung kabagjaan.

-          Uwana pituin, ngiring asih ngiring bingah, pakaulan ngajengkeun du’a, sangkan nu rimbitan, ginuluran karahayuan, buncir leuit loba duit, malar jengkar baranahan.

-          Ka Kang Utang Dian mangga nyanggakeun.

      +   Mugi panuhun didangu, diijabah sapaneja, tinekanan pamaksadan, di dunya pinuh kabungah  di akherat meunang ni’mat.

-          Tutas rantas pamaksadan, dugi kana pamustungan, pitutur pangwuwuh sepuh, dulur-dulur parurubung, kanyaah ti balarea, dumeudeul paheuyeuk leungeun, nu ku harta ku tanaga, ku elmu pon kitu deui, sasarengan ririungan

 +  Ka Gusti Robbul ‘Izzati, nyanggakeun geusan nampina, kasaean sadayana, muga aya pangwalesna, bari jembar katampina.

      Aamiin  yaa Robbal ‘aalamiin.

Pamungkas (sareng)

Tutus langkung kepang halang, bobo sapanon carang sapakan, kaliwat sapanganyaman. Muga agung cukup lumur muga jembar panghampura

Reup,….! teundeun di handeuleum hieum, pikeun sampeureun ka hareup,

Cag,…! tunda di hanjuang siang geusan alaeun nu bakal datang

       +  Urang pungkas ku hamdalah,….alhamdulillahi robbil ‘aalamiin….